«FreeInfoBel» – свабодныя беларусы! Яны жадаюць пабудаваць краіну, у якой будзе велічэзная колькасць розных ініцыятываў і новых сацыяльных праектаў. У якой лідары будуць расці, як грыбы пасля летняга дажджу. Калі хтосьці думае, што цяперашніх структураў, якія ўдзельнічаюць у пратэстным руху і ў будаўніцтве новай Беларусі, ужо цалкам дастаткова, то гэта дакладна не яны!

Не так даўно аўтараў ініцыятывы наведала простая ідэя. Новыя лідары, беларускія зоркі на вольным небасхіле з’явіліся ў вялікай колькасці ў сярэдзіне 2020 году, але гэты працэс працягваецца і цяпер.

Аўтары ініцыятывы вельмі хочуць дапамагаць таленавітым беларусам, якія жадаюць набліжаць светлую будучыню. “FreeInfoBel” будзе рабіць іх вядомымі шырокай аўдыторыі! Для гэтага яны і запусцілі свой праект.

«FreeInfoBel» кожны тыдзень выпускае адно-два інтэрв’ю з простымі (і ня вельмі) людзьмі, якім ёсць што сказаць, у якіх ёсць свежыя ідэі і ёсць здольнасць весці людзей да станоўчых і рэальных мэтаў.