На наш погляд, самым разумным рашэннем для беларусаў на момант напісання гэтага артыкулу было б любым спосабам пазбегнуць прызыву ва ўзброеныя сілы, як мінімум, да заканчэння вайны ва Украіне.

Мы паважаем рашучасць тых нашых суграмадзянаў, якія ўступілі ў Полк Каліноўскага і іншыя атрады, якія абараняюць незалежнасць Украіны. Аднак паміж добраахвотнікамі, якія ваююць на баку Украіны, якая з’яўляецца ахвярай расійскай агрэсіі, і паміж салдатамі тэрміновай службы і рэзервістамі, якіх без іх волі і згоды можа ў любы момант выкарыстоўваць як жывы шчыт гэты самы агрэсар, пралягае велізарная прорва, як маральна-этычная, так ваенна-стратэгічная.

Жыццё кожнага добраахвотніка, які ваюе на баку УСУ, цэніцца і з’яўляецца адным з прыярытэтаў. Жыццё беларуса тэрміновай службы для пуцінскіх генералаў каштуе яшчэ менш, чым іх уласных салдат.

Таму мы сабралі і структуравалі для вас інфармацыю, якая дапаможа вам пазбегнуць прызыву ў армію Беларусі ў гэтым годзе і захаваць не толькі ўласнае жыццё, але і рэпутацыю мірнага і годнага чалавека. Выбар за вамі. І ён у вас ёсць, пакуль вы не патрапілі на поле бою. Пасля ў вас будзе толькі права выканаць загад і памерці.

Каго прызавуць у армію?

Згодна з указам № 34 «Пра звальненне ў запас і прызыў на тэрміновую ваенную службу, службу ў рэзерв», прызыву падлягаюць юнакі ва ўзросце ад 18 да 27 гадоў, якія не маюць падставаў дзеля атрымання адтэрміноўка або якія страцілі права на адтэрміноўку.

Хто не падлягае прызыву?

Ад прызыву на ваенную службу, службу ў рэзерве вызваляюцца грамадзяне:

• прызнаныя па стане здароўя непрыдатнымі да ваеннай службы з выключэннем з воінскага ўліку;
• бацькі, маці, родныя браты ці сёстры якіх, з’яўляючыся ваеннаслужачымі, асобамі каманднага і шараговага складу органаў унутраных справаў, Следчага камітэту Рэспублікі Беларусь, Дзяржаўнага камітэту судовых экспертызаў Рэспублікі Беларусь, органаў фінансавых расследаванняў, органаў і падраздзяленняў па надзвычайных сітуацыях, загінулі ці памерлі або сталі інвалідамі I ці II групы ў выніку калецтва (ранення, траўмы, кантузіі), захворвання, атрыманых пры выкананні абавязкаў ваеннай службы (службовых абавязкаў), а таксама з ліку дзяцей-сіротаў і дзяцей, якія засталіся без апекі бацькоў. Грамадзяне, якія маюць права на вызваленне ад прызыву па гэтай падставе, могуць быць прызваныя на ваенную службу, службу ў рэзерве па іх жаданні;
• якія маюць трох і больш дзяцей;
• якія праходзяць або якія прайшлі альтэрнатыўную службу;
• якія прайшлі ваенную службу ці іншым чынам выканалі воінскі абавязак у іншай дзяржаве.

Прызыву на ваенную службу, службу ў рэзерве не падлягаюць грамадзяне:

• якія адбылі пакаранне ў выглядзе пазбаўлення волі ў папраўчых установах;
• якія маюць судзімасць;
• у дачыненні да якіх судом былі прымененыя прымусовыя меры бяспекі і лячэння, – на працягу тэрміну прымянення гэтых мераў;
• у дачыненні да якіх ажыццяўляецца крымінальны пераслед або крымінальная справа перададзеная пракурору для накіравання ў суд або ажыццяўляецца судовая вытворчасць.

Пагашэнне або зняцце судзімасці анулююць прававыя наступствы крымінальнай адказнасці. Таму тыя, хто адносіцца да гэтай катэгорыі, падлягаюць прызыву на агульных падставах.

Трохі пра медыцынскія паказанні.

Адрозніваюць пяць катэгорыяў прыдатнасці да службы ў войску:

А – прыдатны;

Б – маюцца нязначныя абмежаванні;

В – абмежаваная прыдатнасць альбо “з умовамі”;

Г – часовае неадпаведнасць умовам медкамісіі, магчымая адтэрміноўка.;

Д – не прыдатны.

Поўны пералік захворванняў і адхіленняў, з якімі не бяруць у войска, можна знайсці ў Пастанове Міністэрства абароны Рэспублікі Беларусь, Міністэрства аховы здароўя Рэспублікі Беларусь ад 3 студзеня 2020 г. № 1/1 “Пра зацвярджэнне Інструкцыі наконт вызначэння патрабаванняў да стану здароўя грамадзянаў, звязаных з вайсковым абавязкам”.

Гэта афіцыйны дакумент, які выкарыстоўваюць лекары ваенкамату для вызначэння катэгорыі прыдатнасці ваеннаабавязаных грамадзянаў.

Каб вызначыць, якую катэгорыю прыдатнасці прысвоіць прызыўная камісія, трэба адкрыць дакумент і знайсці адпаведны раздзел і артыкул з патрэбным дыягназам.

Адтэрміноўка ад прызыву на тэрміновую ваенную службу, службу ў рэзерве прадстаўляецца грамадзянам:

• па стане здароўя;
• для працягу адукацыі;
• для праходжання інтэрнатуры і здачы кваліфікацыйнага экзамену па спецыяльнасці інтэрнатуры;
• праз сямейнае становішча;
• для атрымання ваенна-тэхнічных спецыяльнасцяў;
• у сувязі з ажыццяўленнем дэпутацкіх паўнамоцтваў;
• на падставе ўказаў Прэзідэнту Рэспублікі Беларусь.

Адтэрміноўка ад прызыву па стане здароўя прадстаўляецца грамадзянам, прызнаным часова непрыдатнымі да службы па стане здароўя, на тэрмін да аднаго года.

Адтэрміноўка ад прызыву для працягу адукацыі прадстаўляецца на перыяд навучання і прадстаўляецца грамадзянам адзін раз

Адтэрміноўка ад прызыву на тэрміновую ваенную службу, службу ў рэзерве для праходжання інтэрнатуры і здачы кваліфікацыйнага экзамену па спецыяльнасці інтэрнатуры прадстаўляецца лекарам-інтэрнам на перыяд праходжання інтэрнатуры і здачы кваліфікацыйнага экзамену па спецыяльнасці інтэрнатуры.

Адтэрміноўка ад прызыву на тэрміновую ваенную службу, службу ў рэзерве па сямейным стане прадстаўляецца грамадзянам, якія маюць:

• непрацаздольных бацькоў або іншых членаў сям’і, якія маюць патрэбу па стану здароўя ў адпаведнасці з заключэннем урачэбна-кансультацыйнай (медыка-рэабілітацыйнай экспертнай) камісіі ў пастаянным староннім клопаце і не знаходзяцца на поўным дзяржаўным забеспячэнні, – пры адсутнасці іншых працаздольных асобаў, якія пражываюць на тэрыторыі Рэспублікі Беларусь, абавязаных у адпаведнасці з заканадаўствам Рэспублікі Беларусь утрымліваць дадзеных членаў сям’і і клапаціцца пра іх незалежна ад таго, пражываюць яны разам з імі ці асобна, або пры наяўнасці такіх асобаў, якія праходзяць тэрміновую ваенную службу, службу ў рэзерве, альтэрнатыўную службу;
• жонку падчас цяжарнасці, пры наяўнасці пацвярджальных дакументаў;
• жонку і дзіця ва ўзросце да трох гадоў;
• жонку – інваліда І ці ІІ групы;
• дзіця-інваліда;
• дзіця, якое выхоўваецца без маці;
• двух дзяцей;
• маці (бацькі), якая (які) не знаходзіцца ў зарэгістраваным шлюбе і не мае іншых працаздольных дзяцей, якая (які) мае адно дзіця ва ўзросце да трох гадоў, або дваіх і больш дзяцей ва ўзросце да 18 гадоў, або дзіця-інваліда ва ўзросце да 18 гадоў, або дзіця старэй 18 гадоў, якое з’яўляецца інвалідам I ці II групы, або маці з тэрмінам цяжарнасці 28 тыдняў і больш, якая не знаходзіцца ў зарэгістраваным шлюбе і не мае іншых працаздольных дзяцей;
• аднаго і больш родных братоў і сясцёр ва ўзросце да 18 гадоў альбо старэй за 18 гадоў, калі яны атрымліваюць агульную сярэднюю, прафесійна-тэхнічную, сярэднюю спецыяльную адукацыю або з’яўляюцца інвалідамі I ці II групы, – пры адсутнасці іншых асобаў, якія маглі б узяць іх на ўтрыманне.

Непрацаздольнымі бацькамі лічацца бацька і маці, якія дасягнулі агульнаўстаноўленага пенсійнага ўзросту, бацька і маці – інваліды І ці ІІ групы незалежна ад узросту. У выпадку, калі прызыву на тэрміновую ваенную службу, службу ў рэзерве падлягаюць два сыны адначасова, па жаданні бацькоў або асобаў, якія іх замяняюць, адтэрміноўка ад прызыву прадстаўляецца аднаму з іх.

Што можна зрабіць, каб патрапіць пад прызыў?

1. Ігнаруйце ваенкамат
   Атрыманнем позвы лічыцца перадача яе вам у рукі пад распіску прадстаўніком ваенкамату. Калі вам кінулі яе ў паштовую скрыню, пакінулі каля дзвярэй, перадалі праз трэціх асобаў, такія позвы можна і трэба ігнараваць.
2. З’язджайце з Беларусі
   Калі вы знаходзіцеся за межамі краіны, законным чынам уручыць позву вам немагчыма.
3. Не жывіце дома
   Часцей за ўсё позву ўручаюць па месцы жыхарства, таму для падстрахоўкі можна не жыць там, дзе вы зарэгістраваныя. Напрыклад, пераехаць на здымную кватэру, да сваякоў ці сяброў або перабрацца ў іншы горад.
4.  Адкрывайце толькі тым службам, якія самі выклікалі.
   Калі вы нікога не чакаеце, прыкідвайцеся, што нікога няма дома. Супрацоўнікі ваенкамату могуць прадстаўляцца работнікамі ЖКГ, кур’ерамі, паштальёнамі, майстрамі па інтэрнэце і гэтак далей. Насупраць дзвярэй можа стаяць такі супрацоўнік, а на пляцоўцы чакаць ваенны ў форме.
5. Не пакідайце лічбавых слядоў
   Паспрабуйце не публікаваць інфармацыі пра тое, дзе вы жывяце і дзе часта бываеце, і тым больш сторыз з геалакацыяй.
6. Не атрымлівайце позву на працы
   Калі на працы адбываецца раптам абвешчаны сход без канкрэтыкі — лепш перастрахавацца і не хадзіць. Папрасіце бальнічны або спашліцеся на сямейныя абставіны.
7. Шукайце новыя праблемы са здароўем
   Вывучыце спіс захворванняў, на падставе якіх даюць адтэрміноўку або вызваляюць ад службы. Магчыма, што нешта з гэтага ў вас ёсць: плоскаступнёвасць і скаліёз ці нешта больш рэдкае.

Для паўнаты карціны нагадаем пра спосабы пазбегнуць прызыву, з рызыкамі прыцягнення да адказнасці. Тут нікога ні да чаго не заклікаем, аднак лічым што ўлічваць падобныя варыянты лепш, чым ігнараваць.

Нелегальныя спосабы пазбегнуць прызыву.

1. Сімуляваць хваробу
2. Сімуляваць скалатненне мозгу
3. Зламаць руку або нагу
4. Сімуляваць ментальныя захворванні
5. Прыняць забароненыя рэчывы
6. Бегчы праз мяжу
7. Усынавіць дзіця або застацца адзіным бацькам

Беражыце сябе і блізкіх і памятайце, што гэта не наша вайна!